Nye dunkar for glas- og metallemballasje
Utdelinga av dei nye dunkane for glas- og metallemballasje er godt i gong. Til hausten skal alle ha fått ein fjerde dunk.
Prosjektet er stort – totalt skal over 12 500 dunkar delast ut i Askvoll, Fjaler, Hyllestad og Sunnfjord. Nokre innbyggjarar har allereie fått dunken sin, medan andre må vente nokre månader før den blir levert.
Dunken vert plassert på eller nær tømmeplassen din. Følg med i nabolaget – kanskje du allereie har sett dunkar med turkis lokk? Du kjenner att din eigen dunk ved å sjå på adresseetiketten på sida av dunken. Hugs å ta den inn så snart som mogleg etter levering.
Når blir dunken tømt?
Tømming av dei nye dunkane startar først mot slutten av 2025. Du kan ta dunken i bruk allereie no, men ver obs på at det då vil bli liggande i dunken relativt lenge. Pass då på at emballasjen er godt skylt, og sørg for at den ikkje blir så full at den blir for tung til å trille. Alternativt kan du levere glas- og metallemballasje slik som før. Du vil få ein SMS med informasjon om tømmedato når det nærmar seg.
Slik sorterer du rett
Det er lett å tru at alt av glas og metall høyrer heime i dunken – men det stemmer ikkje heilt. Det er berre glas- og metallemballasje som har vore brukt til mat og drikke du skal kaste her.
Ja takk:
- Syltetøyglas
- Hermetikkboksar
- Brusflasker av glas
- Metalltuber (t.d. kaviar)
Nei takk:
- Sprayboksar og gassbehaldarar
- Drikkeglas og vinballongar
- Kakeformer, steikepanner og gryter
- Lyspærer og pyntegjenstandar i glas eller metall
Slike ting må leverast på gjenvinningsstasjonen.
